ARBA'UNA HAADITH (27) HADISI NA ASHIRIN DA BAKWAI

An karɓo daga Nawas ɗan Sam'an (R.A) ya ce, Manzon Allah (ﷺ) ya ce, "Aikin ɗa'a shi ne kyawawan dabi'u, laifi shi ne abin da ya yi kai kawo a zuciyarka, kuma ba ka so mutane su ga kana yin wannan abin." Muslim (#2553) ya rawaito.

An karɓo daga Wabisa (R.A) ya ce, "Na zo wurin Annabi (ﷺ), sai ya ce, "Ka zo ne kana tambaya dangane da ɗa'a?" Sai na ce, "Na‘am!" Sai ya ce, "Ka yi wa zuciyarka fatawa,

aikin ɗa'a shi ne abin da zuciya ta nutsu da shi, amma aikin saɓo kuwa shi ne duk abin da ya yi kai kawo a cikin zuciyarka, ko da mutane za su ba ka fatawa." Hadisi ne mai kyau, mun rawaice shi daga littafin Musnad na Imamu Ahmad (J4/Sh 227) da Musnad na Imam Addarimi (12/ sh 246) da sanadi mai”

SHARHI

Aikin ɗa'a shi ne kyawawan ɗabi'u, kamar hakuri, aikin laifi kuma, shi ne abin da ya yi kai-kawo a cikin zuciyarka. Abin da kai kanka lokacin da kake yi, ba ka nutsu ba da aiwatar da shi, kuma ka ƙi, ba ka so ma mutane su ga kana yin wannan abun, wannan shi ne shubuha. Domin da a ce aikin laifi ne ƙarara akwai nassi a kansa, ai ba ka jiran ka yi kokwanto, nassi kawai ya wadatar. Amma abin da yake nassi bai zo ba ƙarara a kai, to kai kawon da za ka yi a cikin zuciya na nuna wannan abin laifi ne. Da aka ce, “....ba ka son mutane su ga kana yi....” ba wai ana nufin dukkan mutane ba, ana nufin masu ilimi da addini. Duk wanda ka san mai addini ne, mai ilimi, ba ka son ya ji wani abu a fili da kake yi, ba ka son ya gan ka, to wannan abun laifi ne.