ARBA'UNA HAADITH (26) HADISI NA ASHIRIN DA SHIDA

An karɓo daga Abu Hurairata (R.A) ya ce, "Manzon Allah (ﷺ) ya ce, "Dukkan gaɓɓai na mutane akwai sadaƙa a ciki, kowanne yini da rana ke hudowa cikinsa, da za ka sasanta tsakanin mutane biyu, da ke rigima da juna sadaƙa ne, ka taimaki mutum game da dabbarsa, ka ɗora shi a kai, ko ka ɗauki kayansa ka ɗora masa a kan dabbar, sadaƙa ne; kalma daddaɗa sadaƙa ce; dukkan taku da za ka yi tattaki zuwa sallah, sadaƙa ne; ɗauke wani abu mai cutarwa daga kan hanya sadaƙa ne." Bukhari (#2989) da Muslim (#1009) suka rawaito shi!”

SHARHI

Wannan hadisi yana cewa, dukkan gaɓɓai, wato dukkan wata, mahaɗa ta ƙashi, kamar gwiwa, wuyan hannu, ƙafa, da dai sauransu, akwai sadaƙar da mutum zai yi da ita. Haka kowanne yini, wanda a cikinsa da za ka sasanta tsakanin mutane biyu, ka yi adalci tsakanin mutane biyu da ke rigima da juna, sadaƙa ne. Ka wayi gari wane da wane suna rigima, wance ta yi yaji, ka sasanta su ita da mijinta, to wannan za a ba ka ladan ka yi sadaƙa. Haka idan ka taimaki mutum game da dabbarsa; dattijo ne ba zai iya hawa kan dabbarsa ba, sai ka ɗora shi a kai; ko ka zo wata tasha, sai ka ga wani dattijo zai hau mota da nauyin jiki, ka kama ka ɗora shi kan motar nan, ko dukkan wani abin hawa; ko ka ɗauki kayansa ka ɗora masa a kan dabbar don shi ba zai iya yi ba, ko ka kama masa, ka taimaka kuka ɗora tare, to duk dai wannan sadaƙa ce. A wani hadisin sahabbai suke tambayar me za mu yi, ba mu da dukiyar da za mu yi sadaƙa, sai Annabi (ﷺ) ya ce, "Ku yi tasbihi, ku yi hailala, in ba ku samu damar wannan ba, ku yi umami da kyakkyawan aiki, ku yi hani da mummuna, in ba ku sami damar wannan ba, ku faɗi daddaɗar kalma ga 'yan uwanku musulmi sadaƙa ne." Sai ya ce, in duk kun kasa yin wannan, "Ka kame bakinka kar ka faɗi Sharri."